"ӨзенМұнайСервис" жауапкерлігі шектеулі серіктестігі 1-маусым Халықаралық балаларды қорғау күніне орай компания қызметкерлерінің балаларына арнап арнайы көңілді эстафета ойындарын ұйымдастырды. Үш жүзге жуық бала жиналған эстафеталық ойындарда алдымен барлық балалар түрлі мультфильмнің кейіпкерлерімен ән шырқап, билеп мәре-сәре болды. Сайыстар жас ерекшелігі мен ептілігіне қарай бірнеше сатыға бөлінді. Алдымен ұйымдастырушылар "Қазақ елі менің көзіммен" тақырыбында балаларды сурет салудын жарыстырды. Одан әрі қарай велосайыс болды. Балалар ұлттық ойын түрлерін де ойнап бақ сынасты. Оза шыққан жүйріктерге арнайы дипломдар мен бағалы сыйлықтар табысталды. Мерекелік шара балаларды қорғау күніне арналғандықтан барлық балғындарға тегін балмұздақтар үлестірілді. Мерекелік шараны компания басшысы Нұрсейіт Союнов ашып берді. Ол өз сөзінде: " Барлық бала бақытты болуға лайықты. Компания тарапынан қызметкерлердің отбасылары назардан тыс қалған емес. Бүгінгі шараның да мақсаты осы. Өйткені "ӨзенМұнайСервис" жауапкершілігі шектеулі серіктестігінің негізгі байлығы ол - қызметкерлері", деді.