МЕРЕЙТОЙҒА ОРАЙ… 09.09.2022 00:00“ӨзенМұнайСервис” жауапкершілігі шектеулі серіктестігінің 50 жылдық мерейтойына орай мекеменің бас ғимараты алдында ұлан асыр той өткізілді. Еңбек ардагерлерінен бастап құрметті қонақтар, компания мамандары мен өңір өнерпаздары бас қосқан мерекелік жиынның құрметіне алты қанатты ақ үй тігіліп, дастархан жайылды.
“ӨзенМұнайСервис” компаниясы үшін биыл – ерекше жыл. Алғашында кішігірім цех ретінде қызметі басталған ұжым кезең-кезеңімен дамудың арқасында бүгін де бәсекеге қабілетті, сапалы сервистік қызмет көрсететін үлкен серіктестікке айналып отыр. 2016 жылы “Жөндеу” және “Круз” мекемелерінің біріктірілуі нәтижесінде “ӨзенМұнайСервис” ЖШС болып қайта құрылған компания осы жылы жарты ғасырлық тарих парағын елеулі оқиғаларымен толтырды.
Мерейтой кезінде “ӨзенМұнайСервис” ЖШС бас директоры Қанағат Мыңтұрғанов жиналған қауымды құттықтап, компания негізін қалауға атсалысқан ардагерлер мен серіктестік мамандарына алғысын жеткізді.
Ұңғылардың кем-кетігін түзеп, жарасын таңып, бойына қан жүгіртетін емдеуші дәрігерлері атанған өзенмұнайсервистіктерді негізгі серіктес компания өкілдері мен қала әкімдігінің мамандары арнайы құттықтап келді. Салтанатты дастархан басында құрметті қонақтар тарапынан ақжарма тілектер айтылып, ардагерлері ақ батасын берді. Мекеме зейнеткерлерінің иығына шапан жабылып, ілтипат көрсетілді.
Шара кезінде Нұрмұхан Жантөрин атындағы музыкалық драма театр актерлері қойылым қойып, әнші-бишілер өнерлерін ортаға салды. Сонымен қатар, бірқатар мамандарға құрмет грамоталары, алғыс хат және мерейтойлық медальдар табыс етілді. Соның қатарында «Мұнай-газ» кешенін дамытуға қосқан үлесі үшін Б.Рзабековке ҚР Энергетика министрлігінің медалі тағылды. Ал, Қ.Тлейбергенов, К. Карабаев сынды мамандарға министрліктің алғыс хаты табысталды. 50-ге жуық маманға серіктестік атынан мерейтойлық төсбелгі берілсе, 60-тан астам қызметкер алғысқа ие болды. Мерейтойға орай салтанатты жиынға келген қонақтар мен компания мамандарына сағат, блокнот, футболка сынды естелік сыйлықтары тарту етілді.
Ғимарат алдында бір топ қызметкерлер гір тасын көтеру, қошқар көтеру, қол күрес және арқан тартыс сынды спорттық ойындардан сынға түсті.Жекелей және топпен сайысып, жеңімпаз атанғандарға арнайы дайындалған кубок пен грамоталар берілді.
