«ӨЗЕНМҰНАЙСЕРВИС»-КЕ 50 ЖЫЛ 08.09.2022 00:00Тұтас өңірдің ғана емес, алып мемлекетіміздің экономикалық әл-ауқатына тікелей әсер етіп отырған Өзен мұнай алабының ел тарихында алатын орны ерекше. 1960 жылдары бастау алған мұнай өндіру ісінің басы-қасында білікті мамандардың жүруі, олардың қажырлы да табанды еңбегі - атаулы істің бүгінде өнімді өндіріске айналуына мұрындық болып отыр.
Өндіріс тірегі саналатын техникаларға өзіндік күтімі мен тиісті қызметтің уақытылы көрсетілуі де аса маңызды. Яғни, дер кезінде майланбаған кішкентай ғана тетіктің ауыр салдарға ұшырататыны да өндіріс мамандарына жасырын емес. Осылай 1972 жылы қабаттардың мұнай өнімділігін арттыру және скважиналарды күрделі жөндеу басқармасының негізі қаланады. Өзен, Жетібай учаскелерінің жұмысына жауапты бөлімнің басшысы болып Ю.Коротинский мен А.Лифаренко тағайындалған. Өзен учаскесінде жұмысын бастаған бөлімге сол кезде маман табу да қиын болатын. Соған қарамастан, өз қатарын білікті мамандармен толықтырған кәсіби нысан 1973 жылы «Маңғышлақ-нефть» өндірістік бірлестігінің құрамында болса, кейін атауы мен құрылымы өзгерсе де негізгі мақсаты өзгермеген ұйым ретінде елу жылдық тарихты артта қалдырып отыр. Ол қазіргі таңда еліміз бойынша сапалы сервистік қызметтік көрсететін компанияның бірі – “ӨзенМұнайСервис” ЖШ серіктестігі.
«Елу жылда ел жаңа» демекші, бүгінде скважиналарды күрделі жөндеу цехының негізін қалаған ардагер мұнайшылардың қатары азайған. Алайда, олардың көзін көрген, ізін жалғаған ұрпақтары баршылық. Жарты ғасырлық тарихында мекеме өзіндік мектеп, тағылымды тәжірибе қалыптастырды. Мұнайшылардың алаңсыз, скважиналардың тоқтаусыз жұмыс жасауына жағдай жасады.
Осындай атаулы күнде «Мұнайшы» мәдениет үйінде көпшіліктің басын қосқан салтанатты шара ұйымдастырылды.
Жиын шымылдығы серіктестік тарихынан сыр шертетін бейнефильмнен бастау алды. Онда ұжым құрылғаннан бері қарай орын алған елеулі оқиғалар мен ерекше жылдар легі баяндалды. Сонан соң Маңғыстау облыстық Н.Жантөрин атындағы музыкалық драма театрының актерлері сахналаған әсерлі көрініске ұласты.
Мекеме қызметкерлері мен ардагер мұнайшыларды Жаңаөзен қаласының әкімі Айбек Қосуақов, «Өзенмұнайгаз» АҚ бас директоры Мақсат Ибағаров бастаған азаматтар арнайы келіп құттықтап, ізгі лебізін білдірді.
- «Өзенмұнайсервис» ұжымын бүгінгі елеулі мерекемен құттықтаймын. Еліміздің экономикалық дамуы мен отандастарымыздың әл-ауқатының жақсаруы сіздердің қажырлы еңбектеріңіздің арқасы. Мұнай-газ кешені саласының қызметкерлері барлық саланың дамуына, инфрақұрылымдарды жетілдіруге, Қазақстанның өндірістік-өнеркәсіптік базасын жаңғыртуға барынша үлес қосып келеді, - деді. Ал, қала әкімі А.Қосуақов атқарушы органдармен жасалынған келісімдердің мүлтіксіз орындалып, мекеменің өңірдің әлеуметтік ахуалына да ерекше қамқорлық танытып келе жатқандығына тоқталды. – «Өзенмұнайсервис» ұжымы елу жыл ішінде қыруар жұмыс атқарды. Ел басына күн туып, бүкіл әлем коронавирус инфекциясымен күреске жұмылған кезде қаладағы медициналық нысандарға қолдау көрсетті. Атап айтсақ, орталық көпбейінді аурухананың терапия корпусының материалдық-техникалық базасын нығайтуға атсалысты, - деп, мұнайшылардың отбасыларына амандық, дендеріне саулық, елімізге тыныштық тіледі.
Сонымен қатар қала әкімі осы салада табысты қызмет етіп келе жатқан бірқатар мұнайшыларды арнайы алғыс хатпен марапаттап, ілтипатын білдірді.
Бүгінде 1380-ге тарта мұнайшы қызмет жасайтын ұжымның экономикалық, әлеуметтік, рухани саланың барлығында ықпалы зор. Ұжым қаржылай болсын, техникасымен болсын, тіпті мекеме қызметкерлерінің ауызбіршілігімен талай ізгілікті істің жанашыры, бастамашысына айналған. Тәжірибе сабақтастығы қалыптасқан ұжым мерекесінде елу жылдық естелік төс белгілері де өз иелерін тапты. Ардагер мұнайшылар бастаған еңбекте озат, қадамы қарышты жас мамандар да мерейтой төріне шақырылып, мерекелік төсбелгілермен марапатталды.
Елу жыл жөндеу саласында қызмет етіп келе жатқан кәсіби мамандарды арнайы құттықтай келген «Өзенмұнайгаз» АҚ бас директоры Мақсат Оңғарбайұлы мекеменің тарихына тоқтала келіп, атқарылған істің ауқымын атап, алда тұрған міндеттердің маңызын сөз етті. Ал, «Өзенмұнайсервис» серіктестігінің бас директоры Қанағат Мыңтұрғанов мұнайшыларды атаулы күнмен құттықтап, алдағы жұмыс барысына сәттілік тіледі. «ҚазМұнайГаз» акционерлік қоғамы ұлттық компаниясының мұнай кәсіпшілігі және көмір-сутегі ресурстарын пайдалану департаментінің директоры Асхат Дүйсалиев бастаған бірқатар қонақтар ізгі лебіздерін білдіріп, мұнайшыларға марапаттарын табыстады.
Мерекелік шарада мекеменің жұмыс бастауында тұрған Алексей Лифаренко да ортаға шақырылып, медаль табысталып, арнайы сыйлықпен марапатталды.
Мерейтойға орай ұйымдастырылған салтанатты шарада өлкемізге белгілі өнерпаздар өнер көрсетті. Бірі әсем ән шырқап, би билеп, бірі жырымен көрерменнің ықыласына бөленді.
«Мұнайшылар» мәдениет үйінде басталған мерекелік шара мерекелік дастарханға ұласып, марапаттар легі жалғасты.
Э
