"Біз біргеміз" осындай тақырыпта Халықаралық балаларды қорғау күніне орай "ӨзенМұнайСервис" ЖШС жас мамандары қайырымдылық шарасын өткізді. Шараға 75тей аз қамтылған отбасы балалары қатыстырылып көңілді кеш ұйымдастырылды. Қайырымдылық шарасына компания басшысы Нұрсейт Союнов пен Жаңаөзен қаласы "Нұр Отан" партиясы филиалы төрағасының бірінші орынбасары Ғалым Байжанов қатысты. Бір сәтке болса да баланы қуанышқа бөлеген жастардың бұл алғашқы қайырымдылық шарасы емес. Мұқтаж жандарға әрдайым көмек қолын созудан бас тартпайтын "ӨзенМұнайСервис" компаниясының жас мамандары қайырымдылық кеште балалық шақтарын есіне алып, балғындармен бірге билеп көңілді уақыт өткізді. Қайырымдылық шарасына қатысқан барлық балаларға сыйлықтар мен балмұздақтар табысталды. Тәтті дастархан жайылып, ақжарма бала тілектер айтылды.